Bunesholmane

Bunesholmane naturreservat ligg i Askvoll kommune i Vestland og omfattar to større og fem mindre holmar i ope farvatn i den midtre skjærgarden sørvest for Værlandet. Reservatet vart oppretta ved kgl.res. 28. mai 1993 og dekkjer eit totalareal på om lag 320 dekar, der om lag 50 dekar er landareal.

Området er ein viktig hekke- og overvintringslokalitet for sjøfugl. Påviste hekkande artar inkluderer grågås, ærfugl, siland, tjeld, steinvendar, tjuvjo, gråmåse og svartbak. Vegetasjonen er stort sett snau, men sjølve Bunesholmen har frodig vegetasjon mellom devonske svaberg. Hekkebestandane har vore relativt små over lang tid, truleg på grunn av tidlegare minkførekomstar og sviktande næringstilgang.

Verneformålet er å gje sjøfuglane gode og trygge livsvilkår og ta vare på ein viktig hekke- og overvintringslokalitet med naturleg tilhøyrande vegetasjon og dyreliv.

Verneforskrifta forbyr all skade på vegetasjon og dyreliv, og det er ikkje tillate å setje i verk tiltak som kan endre dei naturlege tilhøva. I perioden 1. april til 31. juli er det forbod mot ilandstiging og ferdsel på land og i ei sone på om lag 50 meter frå land. Lågtflyging under 300 meter er også forbode. Unntak gjeld mellom anna for yrkesfiske, tradisjonelt sauebeite og nødvendig offentleg verksemd.