Kuøyna

Kuøyna naturreservat ligg i Askvoll kommune i Vestland og omfattar øyane Ytste Kuøyna og Lamholmen, nokre holmar og skjer, samt omliggande sjøareal. Reservatet er på om lag 368 dekar, der 140 dekar er landareal. Det vart verna ved kgl.res. 28. mai 1993 og er ein del av verneplan for sjøfugl.

Føremålet med vernet er å gje sjøfuglane gode og trygge livsvilkår og ta vare på ein viktig hekkelokalitet med naturleg tilhøyrande vegetasjon og dyreliv. Av hekkande artar er det påvist mellom anna ærfugl, tjeld, steinvendar, vipe, enkeltbekkasin, raudstilk og ulike måseartar. Vegetasjonen er prega av myr og lynghei. Etter år 2000 har det vore lite hekking i reservatet, truleg på grunn av næringssvikt for sjøfuglane.

Verneforskrifta forbyr all skade på vegetasjon og dyreliv, og det er ikkje tillate å setje i verk tiltak som kan endre dei naturlege tilhøva. I perioden 1. april til 31. juli er det forbod mot ilandstiging og ferdsel på landareal og i ei sone på om lag 50 meter frå land. Lågtflyging under 300 meter er òg forbode. Unntatt frå reglane er mellom anna tradisjonelt sauebeite, yrkesfiske og taretråling i perioden 1. august til 31. mars.