Trefotskjera

Trefotskjera naturreservat ligg i Kinn kommune i Vestland, og består av ei mindre samling holmar i den midtre skjergarden mellom Askrova og Svanøy. Området har mykje snaut berg, men stadvis frodig strandeng. Reservatet vart verna ved kongeleg resolusjon 28. mai 1993, og dekkjer eit totalareal på om lag 346 dekar, der om lag 30 dekar er landareal og resten sjøareal.

Området vart verna først og fremst som hekke-, trekk- og overvintringslokalitet for sjøfugl. Påviste hekkande artar inkluderer ærfugl, siland, tjeld, steinvendar, raudstilk, fiskemåse, makrellterne, raudnebbterne og teist. Etter århundreskiftet har terner ikkje blitt observert, og fiskemåsen hekkar berre sporadisk. Næringssvikt for sjøfuglar etter år 2000 er den viktigaste påverknaden på området.

Verneforskrifta forbyr alle inngrep som kan endre dei naturlege tilhøva, og all vegetasjon og alt dyreliv er verna mot skade og øydelegging. I perioden 1. april til 31. juli er det forbod mot ilandstiging og ferdsel på alt landareal og i ei sone ut til om lag 50 meter frå land. Lågtflyging under 300 meter er òg forbode. Taretråling er likevel tillate utanfor ferdselsforbodsperioden. Reservatet inngår i Statsforvaltaren og Statens naturoppsyn sitt overvåkingsprogram for hekkefuglar.