Rognane

Rognane naturreservat ligg i Kinn kommune i Vestland og består av ei samling små og låge skjer i fjorden mellom Hovden og fastlandet. Reservatet vart oppretta ved kgl.res. 28. mai 1993 og dekkjer eit areal på om lag 125 dekar, der berre om lag 4 dekar er landareal.

Området er ein tradisjonell hekkeplass for sjøfuglar. Tidlegare hekka her så mange som 20 par svartbak og ein blandingskoloni av terner på 30–40 par, men bestandane har gått ned. I dag hekkar nokre par svartbak og eit og anna par fiskemåse og tjeld. Andre påviste hekkande artar er ærfugl, tjeld, steinvendar og raudnebbterne. Det generelle næringssviktproblemet for sjøfugl etter år 2000 vert rekna som den viktigaste påverknadsfaktoren.

Føremålet med vernet er å gje sjøfuglane gode og trygge livsvilkår og ta vare på ein viktig hekke-, trekk- og overvintringslokalitet.

Verneforskrifta set klåre grenser for kva som er tillate i reservatet. All vegetasjon og alt dyreliv er verna mot skade og øydelegging. Det er forbode å setje i verk tiltak som kan endre dei naturlege tilhøva, som oppføring av bygningar, drenering, masseuttak og bruk av kjemiske middel. I perioden 1. april til 31. juli er det forbod mot ilandstiging og ferdsel på alt landareal og i ei sone på om lag 50 meter frå land. Lågtflyging under 300 meter er òg forbode. Unntaket gjeld mellom anna rednings- og oppsyntiltak, yrkesfiske og tradisjonelt sauebeite.