Klovningen

Klovningen naturreservat ligg i den ytre skjergarden sørvest for Vågsøy i Kinn kommune, Vestland. Reservatet omfattar øya Klovningen, skjera Skårningane og omliggande sjøareal, og dekkjer totalt om lag 640 dekar, der om lag 210 dekar er landareal. Berggrunnen består av gneisbergartar, og jordsmonnet er grunnlendt men med frodig grasvegetasjon.

Området er ein viktig lokalitet for sjøfugl. Tidlegare hekka artar som lunde, krykkje, havhest, alke og lomvi her, men desse forsvann som hekkefuglar på 1980- og 90-talet. I dag er reservatet særleg viktig for måsefuglar, toppskarv og teist. Reservatet er vurdert som trua, i hovudsak på grunn av næringssvikt for sjøfugl etter år 2000.

Reservatet vart verna ved kgl.res. 28. mai 1993 med føremål om å gje sjøfuglane gode og trygge livsvilkår, og å ta vare på ein viktig hekke-, trekk- og overvintringslokalitet. Forskrifta forbyr mellom anna all skade på vegetasjon og dyreliv, og i perioden 1. april til 31. juli er det forbod mot ilandstigning og ferdsel på landareal og i ei sone på om lag 50 meter frå land. Lågtflyging under 300 meter er òg forbode. Unntak gjeld mellom anna for yrkesfiske, tradisjonelt sauebeite og naudsynt rednings- og oppsynsverksemd. Forvaltningsstyresmakt er Statsforvaltaren i Vestland.