Stallbrekka

Stallbrekka naturreservat ligg i Kinn kommune i Vestland fylke og vart verna ved kgl.res. 28. mai 1993. Reservatet omfattar ein 338 meter høg fjellknaus som stuper i havet mot vest, med eit totalareal på om lag 395 dekar, der 271 dekar er landareal.

Området er eit sjøfuglreservat med hekkande artar som toppskarv, krykkje, gråmåse, svartbak og teist. Stallbrekka er det einaste sjøfuglreservatet i fylket med hekkande krykkje. Havørn og vandrefalk jaktar i området. Vegetasjonen er nokså frodig, slik det er typisk for fuglefjell. Havhesten ser no ut til å ha forsvunne som hekkefugl i fylket. Det er inga kjende trugsmål mot området, men sjøfuglane er generelt råka av næringssvikt etter år 2000.

Verneforskrifta forbyr all skade på vegetasjon og dyreliv. Det er forbode å setje i verk tiltak som kan endre dei naturlege tilhøva, mellom anna oppføring av bygningar og anlegg. I tida 1. april til 31. juli er det forbod mot ilandstiging og ferdsel på land og i ei sone på om lag 50 meter frå land. Lågtflyging under 300 meter er forbode. Unntak gjeld mellom anna for militær verksemd, redningsteneste, yrkesfiske og tradisjonelt sauebeite.