Vassøyane

Vassøyane naturreservat ligg i Gulen kommune i Vestland og omfattar om lag hundre øyar, holmar og skjer i den ytre skjergarden sør for Sognesjøen. Reservatet dekkjer eit totalareal på om lag 6 180 dekar, der 1 870 dekar er landareal. Berggrunnen er konglomerat av devonsk alder, og jordmonnet er grunt og næringsfattig.

Området har store naturfaglege verdiar knytt til fugleliv og vegetasjon. Det er registrert over 40 fugleartar som er avhengige av våtmark, og området er ein viktig raste-, beite- og overvintringslokalitet for våtmarksfugl. Vegetasjonen er dominert av atlantisk lynghei og nedbørsmyr, med artar som røsslyng, krekling, klokkelyng og gråmose.

Reservatet vart freda ved kongeleg resolusjon 20. desember 1991, med heimel i den dåverande naturvernlova. Verneformålet er å ta vare på eit viktig våtmarksområde med naturleg vegetasjon og dyreliv, særleg som trekk- og overvintringslokalitet for våtmarksfugl og som typeområde for atlantisk lynghei.

Verneforskrifta forbyr mellom anna all skade på vegetasjon og dyreliv, jakt og fangst, motorisert ferdsel på land og lågtflyging under 300 meter. I perioden 1. april til 1. august er all ilandstigning og ferdsel på land og i sjø ut til 50 meter frå land forbode. Grunneigarar og yrkesfiskarar har likevel visse rettar til ferdsel og fiske. Forvaltningsstyresmakta kan gje løyve til tradisjonelt beite, hausting av tang og tare og rydding av vegetasjon. Statsforvalteren i Vestland forvaltar reservatet.