Torsholmane

Torsholmane naturreservat ligg i Solund kommune i Vestland og omfattar holmane Indre Torsholmen og Ytre Torsholmen, nærliggande skjer og omliggande sjøareal. Reservatet dekkjer eit totalareal på om lag 376 dekar, der om lag 35 dekar er landareal. Vegetasjonen er dominert av frodig strandeng.

Området er ein viktig hekke- og overvintringslokalitet for sjøfugl. Registrerte hekkande artar inkluderer ærfugl, tjeld, svartbak, gråmåse, sildemåse, fiskemåse, raudnebbterne, makrellterne og tjuvjo. Etter at SNO rydda den tilgrodde Indre Torsholmen vinteren 2007/08, har holmen utvikla seg til den største fiskemåsekolonien i fylket og er ein av få faste hekkeplassar for terner i Vestland.

Verneforskrifta fastsett ved kongeleg resolusjon 28. mai 1993 slår fast at all vegetasjon og alt dyreliv er verna mot skade og øydelegging. Det er forbode å setje i verk tiltak som kan endre dei naturlege tilhøva. I perioden 1. april til 31. juli er det forbod mot ilandstiging og ferdsel på alt landareal og i ei sone på om lag 50 meter frå land. Lågtflyging under 300 meter er òg forbode. Unntaka frå ferdselsforbodet gjeld mellom anna militær og operativ verksemd, yrkesfiske og tradisjonelt sauebeite. Forvaltningsansvaret ligg hos Statsforvaltaren i Vestland.