Vetlefjordsøyra

Vetlefjordsøyra naturreservat ligg ved utløpet av Vetlefjordselva der ho renn ut i Vetlefjorden, ein sidearm til Sognefjorden i Sogndal kommune. Reservatet vart freda ved kongeleg resolusjon 20. desember 1991 og dekkjer eit totalareal på om lag 172 dekar, av dette er om lag 57 dekar landareal.

Området er eit viktig våtmarksområde med strandeng og deltalandskap. Vegetasjonen er typisk for slike miljø, med artar som saltsiv, fjørsauløk, fjøresivaks og krypkvein. Den raudlista arten pusleblom (EN) og pølstarr er tidlegare registrert her. Det er registrert om lag 35 artar av våtmarksfugl i området, og deltaet har særleg verdi for ande- og vadefuglar i trekktida, spesielt om våren.

Verneformålet er å ta vare på deltaområdet som naturtype, både geomorfologisk og som strandeng, og å sikre verdiane for våtmarksfugl i trekktida.

Verneforskrifta forbyr inngrep som kan endre naturforholda, mellom anna bygging, drenering, motorferdsel og bruk av kjemiske middel. All vegetasjon og alt vilt er freda, og jakt er forbode. All ferdsel er forbode i reservatet frå 1. april til 1. august. Jordbruksdrift på eksisterande fulldyrka jord er likevel tillate, og fiske er òg tillate. Forvaltningsstyresmakta kan gje løyve til mellom anna tradisjonell slått og beite, og rensing av elveløp. Statsforvalteren i Vestland er forvaltningsstyresmakt.