Svarteskjeret

Svarteskjeret naturreservat ligg i den ytre skjergarden i Askvoll kommune i Vestland, vest for Alden. Reservatet består av to skjer med eit samla areal på om lag 77 dekar, der 13 dekar er landareal. Berggrunnen er av kambrosilurske sedimentbergartar, og vegetasjonen er relativt rik i kløfter og sprekker som er skjerma for vind.

Reservatet er ein viktig lokalitet for sjøfugl. Tidlegare hadde området gode hekkebestandar av måsar, men sidan 90-talet har ein berre registrert enkeltpar av svartbak, gråmåse og tjeld. Andre hekkande artar er ærfugl, raudnebbterne og teist. Den generelle næringssvikten langs kysten etter år 2000 vert rekna som hovudårsaka til nedgangen i fuglelivet.

Reservatet vart verna ved kgl.res. 28. mai 1993 med føremål om å gje sjøfuglane gode og trygge livsvilkår og ta vare på ein viktig hekke- og overvintringslokalitet.

Verneforskrifta forbyr all skade på vegetasjon og dyreliv, og det er ikkje tillate å setje i verk tiltak som kan endre dei naturlege tilhøva. Frå 1. april til 31. juli er det forbod mot ilandstiging og ferdsel på landareal og i ei sone på om lag 50 meter frå land. Lågtflyging under 300 meter er også forbode. Unntaka frå desse reglane gjeld mellom anna militær verksemd, redningsteneste, yrkesfiske og tradisjonelt sauebeite.