Karsskjeret

Karsskjeret naturreservat ligg i Kinn kommune i Vestland, nord for Svanøy. Reservatet omfattar eit lite, nesten vegetasjonslaust skjer saman med holmen Naustholmen og omliggande sjøareal, med eit totalareal på om lag 10 dekar, der det meste er sjøareal.

Området er verna som ein viktig hekke- og overvintringslokalitet for sjøfugl. Registrerte hekkande artar er makrellterne, rødnebbterne, svartbak, fiskemåse og tjeld. Skjeret var ein fast hekkeplass for terner fram til og med 2008, då ternene forsvann frå lokaliteten.

Verneforskrifta frå 1993 fastset strenge reglar for å sikre sjøfuglane gode livsvilkår. All vegetasjon og alt dyreliv er verna mot skade og øydelegging. I perioden 1. april til 31. juli er det forbod mot ilandstiging og ferdsel på land og i ei sone på om lag 50 meter frå land. Lågtflyging under 300 meter er forbode. Det er heller ikkje tillate å setje i verk tiltak som kan endre dei naturlege tilhøva i området. Jakt er tillate i perioden 10. september til 31. mars, og yrkesfiskarar kan ferdast med båt i den freda perioden. Statsforvalteren i Vestland er forvaltningsmyndigheit.