Indre-Ånnøy

Indre-Ånnøy naturreservat ligg på den austlegaste delen av øya Ånnøy, om lag 4 km vest av Florø i Kinn kommune, Vestland. Reservatet vart verna ved kgl.res. 28. mai 1993 og dekkjer eit totalareal på om lag 203 dekar, der om lag 84 dekar er landareal og resten sjøareal. Forvaltningsmyndigheit er Statsforvaltaren i Vestland.

Vegetasjonen er prega av lynghei med innslag av myr. Området har vore ein regionalt viktig hekkelokalitet for sjøfuglar, mellom anna grågås, ærfugl, tjeld, raudstilk, småspove, svartbak, gråmåse og sildemåse. I seinare år har hekkinga gått kraftig tilbake, truleg på grunn av næringssvikt langs kysten og at lyngheia har vorte for grov. Lyngheia vart brent i 2011 som eit skjøtselstiltak, og reservatet inngår i eit overvåkingsprogram for hekkefuglar.

Verneformålet er å gje sjøfuglane gode og trygge livsvilkår og å ta vare på ein viktig hekkelokalitet med naturleg tilhøyrande vegetasjon og dyreliv.

Verneforskrifta forbyr all skade på vegetasjon og dyreliv, og det er forbod mot tiltak som kan endre dei naturlege tilhøva. I perioden 1. april til 31. juli er det forbod mot ilandstiging og ferdsel på land og i ei sone på om lag 50 meter frå land. Lågtflyging under 300 meter er også forbode. Unntatt frå reglane er mellom anna tradisjonelt sauebeite, yrkesfiske, jakt i perioden 10. september til 31. mars, og taretråling i perioden 1. august til 31. mars.