Flatøy

Flatøy naturreservat ligg i Granesundet sør for Askvoll sentrum i Vestland, i overgangen til Dalsfjorden. Reservatet omfattar øya Flatøy, nærliggande skjer og omliggande sjøareal, og dekkjer eit totalareal på om lag 250 dekar, der om lag 75 dekar er landareal. Vegetasjonen er prega av atlantisk myr, lynghei og strandeng, og fjellgrunnen består av gneisbergartar.

Området er ein viktig lokalitet for sjøfugl, og verneformålet er å gje sjøfuglane gode og trygge livsvilkår som hekke-, trekk- og overvintringsstad. Reservatet utmerkar seg ved eit breitt artsutval, mellom anna grågås, ærfugl, tjeld, storspove, makrellterne og fleire vadefuglartar. Frå 1990-talet grodde området gradvis til med bartre og lauvkratt etter at sauebeiting tok slutt, noko som reduserte verdien som hekkeplass. Etter rydding av skog og kratt i 2007 og 2008 er fuglane no på veg tilbake, men dårlege næringstilhøve langs kysten gjer at utviklinga går seint.

Verneforskrifta blei fastsett ved kongeleg resolusjon 28. mai 1993. All vegetasjon og alt dyre- og fugleliv er verna mot skade og øydelegging. I tida frå 1. april til 31. juli er det forbod mot ilandstiging og ferdsel på alt landareal og i ei sone på om lag 50 meter frå land. Lågtflyging under 300 meter er også forbode. Unntatt frå reglane er mellom anna militær og operativ verksemd, redningsteneste, tradisjonelt sauebeite og yrkesfiske for manntalsførte fiskarar.