Bukta

Bukta fuglefredingsområde ligg ved Sandane sentrum i Gloppen kommune, der Gloppeelva og Fitjeelva møter botnen av Gloppefjorden. Området er eit delta med strandflater og preg av estuar, og dekkjer om lag 495 dekar, der nesten alt er sjøareal.

Området har særleg verdi som kvile- og rasteplass for våtmarksfugl under trekk, og som overvintringslokalitet. Det er registrert ei rekke artar, mellom anna sjeldne som ringgås, kvitkinngås, kortnebbgås, skeiand, knekkand og mandarinand. Av sjeldne og trua plantar er pusleblom, firling og dvergsivaks verdt å nemne. Området er også eit verdifullt marint delta og estuar med interessante vegetasjonstypar.

Fredinga vart fastsett ved kgl.res. 20. desember 1991 med heimel i lov om naturvern. Verneforskrifta forbyr alle former for skade på vegetasjon og fugleliv, jakt, fangst og bruk av skytevåpen. Hundar skal haldast i band. Tiltak som drenering, oppfylling, forureining og tømming av avfall er forbodne. Lågtflyging under 300 meter er ikkje tillate, og bruk av motorbåtar og seglbåtar er forbode frå 1. september til 30. april. Forvaltningsstyresmakta er Statsforvalteren i Vestland.