Sørestrandvatnet

Sørestrandvatnet naturreservat ligg i Øvre Lavikdal i Høyanger kommune i Vestland. Reservatet vart freda ved kongeleg resolusjon 20. desember 1991 og dekkjer eit areal på om lag 1 160 dekar, der om lag 540 dekar er landareal.

Vatnet er omkransa av låge, skogkledde åsar. Vassvegetasjonen er dominert av sennegras, elvesnelle og strandrøyr, samt gul og kvit nykkerose. Det er registrert 46 artar av våtmarksfugl i området, og vatnet har særleg verdi som hekke- og trekklokalitet for ande- og vadefugl. Det er også gjort hekkefunn av jordugle på myrområda i sør. Området har førekomst av terrengdekkjande myr. Vatnet er påverka både av naturleg myrvatn og av menneskeskapt gjødseltilførsel frå nærliggande jordbruk og busetnad.

Føremålet med fredinga er å ta vare på eit viktig våtmarksområde med naturleg vegetasjon og dyreliv, særleg med omsyn til verdien som trekk- og hekkelokalitet for våtmarksfugl.

Verneforskrifta forbyr mellom anna all skade på vegetasjon, jakt og fangst, motorisert ferdsel på vatn og land, camping og tiltak som kan endre dei naturgjevne tilhøva. I hekketida, frå 1. april til 1. august, er all ferdsel på holmane i vatnet forboden. Tradisjonelt beite, sanking av bær og matsopp og vedlikehald av eksisterande vegar og kraftliner er likevel tillate. Forvaltningsstyresmakta er Statsforvalteren i Vestland.