Lonavatnet

Lonavatnet naturreservat ligg mellom tettstadene Klepp og Sandnes i Rogaland, og utgjer ei utviding av Figgjoelva på grensa mellom dei to kommunane. Reservatet er på 318 dekar og vart freda ved kongeleg resolusjon 20. desember 1996.

Området er ein viktig overvintringslokalitet for ender og svaner, med opptil 700 ender og 30 songsvaner. Det er også eit godt hekkeområde med artar som sivsongar, knoppsvane, sothøne og toppdykkar. Fleire raudlista artar er registrerte, mellom anna grashoppesongar (VU), vassrikse (VU) og dvergdykkar (NT). Over 100 fugleartar er observerte ved vatnet. Dominerande plantar er takrør og sjøsivaks, som veks i breie belte langs vatnet.

Fredningsforskrifta slår fast at all vegetasjon og alt dyreliv er freda mot skade og forstyrring. Jakt, fangst og bruk av skytevåpen er forbode, og hundar skal haldast i band. Det er heller ikkje tillate å setje i verk tiltak som kan endre dei naturgjevne forholda, og motorisert ferdsel til lands og til vanns er forbode. Lavtflyging under 300 meter er òg forbode. Fiske, tradisjonelt beite og vedlikehald av kraftlinjer er likevel tillate. Forvaltningsansvaret ligg hos Statsforvaltaren i Rogaland.