Bjargavatnet

Bjargavatnet naturreservat ligg på søraustlege delen av Rennesøy i Stavanger kommune, Rogaland. Reservatet vart freda ved kgl.res. 20. desember 1996 og dekkjer eit areal på om lag 130,5 daa.

Området består av eit eutrofiert vatn, myr og sumpar som grensar til eit stort lyngheiområde. Vatnet har dei siste 70–80 åra gjennomgått ei utvikling frå næringsfattig til næringsrikt og sterkt attgrodd, som følgje av intensivt landbruk i nærleiken. Rundt vatnet finst takrørsump, flytebladvegetasjon med nøkkerose, høgstorrsump med flaskestorr og elvesnelle. Området er særleg viktig som trekk- og hekkeområde for våtmarksfugl, og Rennesøy ligg gunstig til i trekkruta for mange fugleartar. Ender, gås, vadefuglar og rovfuglar nyttar området aktivt.

Føremålet med fredinga er å ta vare på våtmarksområdet med naturleg vegetasjon og dyreliv, særleg som kvile- og rasteplass for våtmarksfugl på vår- og hausttrekket. Verneforskrifta forbyr mellom anna inngrep som kan endre naturmiljøet, motorisert ferdsel, jakt og fangst, camping og innføring av nye plante- og dyreartar. Tradisjonell beiting, fiske og fangst av villmink er likevel tillate. Forvaltningsstyresmakta kan gje løyve til enkelte tiltak, som felling av skadegjerande dyr og nødvendige landbrukstiltak.