Drotninghei

Drotninghei naturreservat ligg i Suldal kommune i Rogaland og vart freda ved kgl.res. 17. desember 1999. Reservatet dekkjer eit totalareal på 5900 dekar og omfattar eit kupert åsparti nord for Suldalslågen og vest for Ritlandsvatnet, der det meste av arealet ligg mellom 350 og 500 meter over havet.

Området er eit stort og skogrikt furuskogsområde som er typisk for Indre Ryfylke. Berggrunnen består av foliert granitt som gjev lite plantenæring. Furuskogen er særleg produktiv i liane, med tett og rettstamma furu opp i 16–20 meters høgd. Skogstypane varierer frå tørr blåbær- og tyttebærfuruskog i sørsida til meir moserik blåbærskog i aust og vest. I nordvesthjørnet finst lågurtfuruskog med hassel og gammal bjørk. Området har eit oseanisk preg, med førekomstar av storstylte og raudmuslingmose. Det er registrert 87 karplanteartar, og området er særleg viktig for storfugl, orrfugl, hønsehauk og hjort.

Etter fredingsforskrifta er vegetasjon og dyreliv freda mot skade og øydelegging. Det er forbode å fjerne planter, føre inn nye artar, setje i verk inngrep som kan endre naturmiljøet, eller ferdast med motoriserte køyrety. Sanking av bær og matsopp, jakt, fiske og beiting på eit nivå som ikkje skader fredingsformålet, er likevel tillate. Forvaltningsmyndigheit er Suldal kommune.