Storsøy

Storsøy naturreservat ligg på vestsida av Laukhammarsundet i Stord kommune. Øya er på 220 dekar og har vore verna sidan 1977, først som landskapsvernområde og deretter som naturreservat frå 17. desember 1999.

Berggrunnen på Storsøy består av kalkspatmarmor og fyllitt, noko som gjev eit særs kalkrkt jordsmonn. Kombinert med det milde og skjerma kystklimaet har dette resultert i eit eksepsjonelt artsmangfald. Det er registrert heile 464 planteartar på øya. Skogen er dominert av furu med innslag av bergflette, kristtorn og barlind. Feltsjiktet inneheld artar som blodstorknebb, hengjeaks, blåknapp og svartknoppurt, medan botnsjiktet er dominert av kalkfjørmose og vanleg sigdmose. Området er særleg kjent blant botanikarar over heile landet.

Verneforskrifta frå 1999 slår fast at vegetasjon og dyreliv er freda mot skade og øydelegging. Det er forbode å fjerne planter eller innføre nye plante- og dyreartar. Motorisert ferdsel, bålbrenning og telting er ikkje tillate. Sanking av bær og matsopp, jakt, fiske og beiting på eit nivå som ikkje skadar fredingsformålet er likevel tillate. Forvaltningsstyresmakta kan etter søknad gje løyve til mellom anna avverking av framande treslag og bruk av området til undervisning.