Liafjellet

Liafjellet naturreservat ligg ca. 2,5 km vest for Sjøholt i Ålesund kommune, Møre og Romsdal, og vart freda ved kgl.res. 17. desember 1999. Reservatet dekkjer eit totalareal på 1360 dekar og er eit terrestrisk skogvernområde.

Området er tilnærma urørt og rekna som noko av det mest urskogsnære barskogområdet som er registrert på Nordvestlandet. Furuskogen har tre i alder opp til 400 år, og det er ei tydeleg høgdegradient i vegetasjonen frå tresett fjellmyr øvst, via røsslyng-blokkebærfuruskog, og ned til blåbærfuruskog med artar som bjønnkam, engmarimjelle og storfrytle. I dei rikare lågurtpartia finst barlind og hassel, og vest i området er det innslag av bjørkeskog og atlantisk småmyr med rome.

Fredingsforskrifta forbyr hogst, inngrep og tiltak som kan endre naturmiljøet, motorisert ferdsel, samt organisert bruk som idrettsarrangement og jaktprøver. Sykling og riding utanfor eksisterande vegar er heller ikkje tillate. Sanking av bær og matsopp, jakt, fiske og beiting på eit forsvarleg nivå er likevel tillate. Forvaltningsstyresmakta kan etter søknad gje løyve til mellom anna avverking av plantefelt og uttak av framande treslag. Platanlønn er i ekspansjon i dei rikare delane av reservatet, og det er eit mål å få fjerna dette framande treslaget.