Krokvatnet

Krokvatnet naturreservat ligg i Aure kommune i Møre og Romsdal, i ein liten dal mellom Vinsternesfjellet og Ormbostadfjellet. Reservatet omfattar eit veldefinert nedbørsfelt på 2432 dekar, og berggrunnen er gneis.

Skogen er dominert av kystforma røsslyng-blokkebærfuruskog og er stort sett oligotrof. I den nordaustvendte lia ned mot Krokvatnet finst ein frodig blåbærfuruskog. På skrinn mark står furuskog med mykje lav og gråmose, medan meir gunstige grunnforhold gjev innslag av lågurter og bjørk. Myrene er fattige fastmattemyrar. Det står ein god del gadd i området, og skogen er generelt gamal. Nokre furutre er målte til over 400 år gamle.

Reservatet vart freda ved kgl.res. 17. desember 1999. Formålet er å sikre eit skogområde med alt naturleg plante- og dyreliv, særleg den svært lite påverka naturskogen. Vegetasjon og dyreliv er freda mot skade og øydelegging, og det er forbode å setje i verk tiltak som kan endre naturmiljøet. Motorisert ferdsel er forbode, det same gjeld organisert idrett og bruk av sykkel eller hest utanfor eksisterande vegar. Sanking av bær og matsopp, jakt, fiske og beiting på eit nivå som ikkje skader fredingsformålet er likevel tillate. Forvaltningsstyresmakt er Statsforvalteren i Møre og Romsdal.