Ulvikpollen

Ulvikpollen naturreservat ligg inst i Ulvikpollen i indre Hardanger i Ulvik kommune og vart freda ved kgl.res. 15. desember 1995. Reservatet dekkjer eit totalareal på om lag 84 dekar, der 16 dekar er landareal og resten sjøareal.

Området har særleg verdi for trekkande og overvintrande våtmarksfugl. Dominerande artar er stokkand, krikkand og enkeltbekkasin, og under vårtrekket er mellom anna grågås, brunnakke, siland og heilo å sjå. Vegetasjonen er sonert med undervasseng ytst, strandsump i midten og strandeng innst. Desse sonene inneheld uvanleg fine vegetasjonsutformingar med innslag av sjeldne artar, mellom anna småvasskrans som er klassifisert som sårbar på raudlista.

Fredningsforskrifta forbyr all skade på vegetasjon og dyreliv, jakt og fangst, motorisert ferdsel på land og vatn, lågtflyging under 300 meter, camping og tiltak som kan endre dei naturlege tilhøva. Fiske og sanking av bær og matsopp er likevel tillate. Forvaltningsstyresmakta kan gje løyve til mellom anna kontrollert rydding av vegetasjon og nødvendige landbrukstiltak. Ulvik kommune er forvaltningsmyndighet for reservatet.