Skogafjellet

Skogafjellet naturreservat ligg ved Berge på søre Bømlo i Bømlo kommune, og dekkjer eit areal på 667 dekar. Reservatet strekk seg frå Bergesvatnet i sør opp til Dugnadssåta (104 moh) i nord, og har eit sterkt oseanisk klima med milde vintrar og somrar.

Området har særs høge naturfaglege kvalitetar. Her finst truleg den vestlegaste, og ein av dei største kalkfuruskogane i Hordaland, med innslag av bergflette og kristtorn. I tillegg har området ein av dei finaste og største førekomstane av purpurlyngfuruskog på Vestlandet. Den sørvendte lia gjev gode vekstforhold for furu og urter, medan platået på toppen har meir karrige tilhøve. Området har stor verdi for forsking og undervisning.

Reservatet vart freda ved kongeleg resolusjon 17. desember 1999, med heimel i naturvernlova. Fredinga skal sikre skogområdet med alt naturleg plante- og dyreliv. Regelverket forbyr mellom anna hogst, innføring av nye plante- og dyreartar, motorisert ferdsel, bålbrenning og andre tiltak som kan endre naturmiljøet. Sanking av bær og matsopp, jakt, fiske og beiting på eit nivå som ikkje skader fredingsformålet, er likevel tillate. Forvaltningsstyresmakta, som er Statsforvaltaren i Vestland, kan etter søknad gje løyve til mellom anna avverking av plantefelt og avgrensa bruk til undervisning.