Skiftestad

Skiftestad naturreservat ligg i Sveio kommune, om lag tre kilometer nordvest for Sveio sentrum, og omfattar to små tjørn og ei myr som er delvis prega av attgroing. Reservatet er på 115 dekar og vart freda ved kongeleg resolusjon 15. desember 1995. Forvaltningsmyndigheit er Statsforvalteren i Vestland.

Området har først og fremst verdi som hekkeområde for grasender som stokkand, krikkand og brunnakke. Av vadefuglar hekkar raudstilk, enkeltbekkasin og vipe, og sivsporv er representert blant sporvefuglane knytt til våtmarka. Området har òg funksjon som tidleg og sein flokkfaselokalitet for brunnakke og krikkand.

Føremålet med vernet er å sikre eit nokså upåverka våtmarksområde med hekkefunksjon for grasender og flokkfasefunksjon for brunnakke.

Fredningsforskrifta slår fast at all vegetasjon i vatn og på land er freda mot skade og øydelegging, og at nye planteartar ikkje må innførast. Dyrelivet, medrekna reirplassar, er freda, og jakt, fangst og bruk av skytevåpen er forbode. Motorisert ferdsel på land og vatn er ikkje tillate, og lågtflyging under 300 meter er forbode. Camping og teltslåing er heller ikkje tillate. Sanking av bær og matsopp, fiske og beite som på vernetidspunktet er likevel tillate.