Rekvesøyane

Rekvesøyane naturreservat ligg på nordsida av Vangsvatnet i Voss kommune, på ytre del av deltaet der elva Dyrvo renn ut i vatnet. Reservatet vart freda ved kgl.res. 15. desember 1995 og dekkjer eit areal på om lag 190 dekar.

Området er eit viktig våtmarksområde langs Vossovassdraget. Ved høg vasstand nyttar særleg andefugl området, medan vadefuglar er meir talrike ved låg vasstand. Rekvesøyane er det viktigaste rasteområdet for trekkfugl langs trekkruta i Vossovassdraget, og fungerer òg som oppvekstområde for andungar frå store delar av Vangsvatnet.

Fredningsforskrifta forbyr all skade på vegetasjon og dyreliv, jakt og fangst, motorisert ferdsel på land og vatn, lågtflyging under 300 meter, camping og tiltak som kan endre dei naturgitte tilhøva. Fiske, sanking av bær og matsopp og beite er likevel tillate. Forvaltningsstyresmakta kan gje løyve til mellom anna kontrollert rydding av vegetasjon og forsiktig tilrettelegging av landskapet. Statsforvalteren i Vestland er forvaltningsstyresmakt for reservatet.