Otterstadstølen

Otterstadstølen naturreservat ligg i Modalen kommune i Vestland og omfattar eit areal på 2357 dekar. Reservatet vart freda ved kgl.res. 17. desember 1999.

Den viktigaste naturfaglege kvaliteten er granskogen, som blir rekna som den vestlegaste samanhengande naturgranskogen i landet. Grana kom truleg til Modalen på 1500–1600-talet. Skogen har eit opphavleg preg med tre i alle aldrar, der nokre er over 200 år gamle. Bjørk, osp og rogn er vanlege innslag, og meir sjeldan førekjem eik og hassel. Berggrunnen er gneis, og klimaet er fuktig med relativt låge temperaturar.

Formålet med fredinga er å sikre skogområdet med alt naturleg plante- og dyreliv, med særleg vekt på å ta vare på den vestlegaste naturgranskogen i Noreg.

Fredingsforskrifta forbyr mellom anna hogst, innføring av nye plante- og dyreartar, fysiske inngrep og motorisert ferdsel. Sanking av bær og matsopp, jakt, fiske og beiting på eit nivå som ikkje skader fredingsformålet er likevel tillate. Det er òg høve til vedlikehald av stølshus og avgrensa hogst knytt til stølsdrift. Forvaltningsstyresmakta er Statsforvaltaren i Vestland.