Lokna

Lokna naturreservat ligg i Sveio kommune i Vestland og omfattar dei to småvatna Sandvatnet og Loknatjørna, med eit totalareal på om lag 184 dekar. Området vart freda ved kongeleg resolusjon 15. desember 1995.

Området er eit produktivt våtmarksområde med viktige funksjonar for fugleliv. Det hekkar grasender som brunnakke, stokkand og krikkand, og vadefuglar som vipe, raudstilk og enkeltbekkasin. Songsvane og kanadagås nyttar området under trekk og om vinteren. Loknatjørna er grunt og vegetasjonsrikt med artar som flaskestorr, elvesnelle, nykkerose og tjønnaks, medan omgivnadene er dominerte av lynghei.

Fredningsforskrifta slår fast at all vegetasjon og alt dyreliv er freda mot skade og øydelegging. Jakt, fangst og bruk av skytevåpen er forbode, og hundar skal haldast i band. Motorisert ferdsel på land og vatn er ikkje tillate, og lågtflyging under 300 meter er forbode. Det er heller ikkje tillate å setje i verk tiltak som kan endre dei naturlege tilhøva, som drenering, oppfylling eller gjødsling. Fiske, sanking av bær og matsopp og beite som på vernetidspunktet er likevel tillate. Forvaltningsstyresmakta kan gje løyve til enkelte tiltak, mellom anna kontrollert rydding av vegetasjon i samsvar med forvaltningsplanen.