Kvernavatnet

Kvernavatnet naturreservat ligg på Huftarøy i Austevoll kommune i Vestland. Reservatet er på 2916 dekar og vart freda ved kongeleg resolusjon 17. desember 1999. Det er eit typisk kystbarskogsreservat med furudominert naturskog som viser god variasjon langs ein høgdegradient frå vatnet og opp til vel 200 meter over havet. Skog dekkjer nær 90 prosent av arealet, medan myr og vatn utgjer resten.

Dei naturfaglege kvalitetane er særleg knytt til verdien som referanseområde for naturleg furuskog i distriktet. Skogen varierer frå grove og rettstamma furutre i liene ned mot vatnet til krokfuruer på toppane. Eit typisk trekk er eit stadvis tett busksjikt av einer. Feltsjiktet varierer frå frodig bjørke- og furuskog med artar som skogburkne og kusymre i liene, til fattige skogtypar med røsslyng, klokkelyng og kystbjønnskjegg på dei høgaste nivåa. Myrane er fattige med tuestruktur og artar som torvull og dikesoldogg.

Fredingsforskrifta slår fast at vegetasjon og dyreliv er freda mot skade og øydelegging, og at det ikkje er tillate å fjerne planter eller innføre nye plante- eller dyreartar. Inngrep som bygging, drenering, motorferdsel og organisert bruk er forbode. Sanking av bær og matsopp, jakt, fiske og beiting på eit nivå som ikkje skader fredingsformålet er likevel tillate. Forvaltningsstyresmakta, som er Statsforvaltaren i Vestland, kan etter søknad gje løyve til mellom anna avverking av plantefelt med framande treslag.