Flotaneset

Flotaneset naturreservat ligg i Modalen kommune i Vestland, i den søraustvendte lia under Raunefjellet ved Mostraumen på nordsida av Mofjorden. Reservatet er på 733 dekar og vart freda ved kongeleg resolusjon 13. oktober 2000.

Området er særleg kjent for ein unik førekomst av barlind. Trea veks spreidd i grupper, oftast under furu eller saman med eik, og bestanden tel truleg 150–200 større tre. Det største hotreet av barlind kjent i Norden står her, med eit stammeomfang på 4 meter ved rota og ei høgd på 8 meter. Saman med barlindførekomstane ved Hestabotn ligg området langt frå andre kjende barlindførekomstar, noko som gjer det vitskapeleg interessant som referanseområde. Bergrunnen er næringsfattig gneis, klimaet er svært fuktig, og både sommar- og vintertemperaturane er relativt låge.

Ein utfordring for reservatet er beiting frå hjort, som har gjort skade på vegetasjonen og truleg også et småplantene av barlind, noko som hemmar forynginga.

Verneforskrifta forbyr inngrep som kan endre naturmiljøet, fjerning av planter, innføring av nye planteartar, motorisert ferdsel og organiserte arrangement. Sanking av bær og matsopp, jakt, fiske og tradisjonell beiting er likevel tillate. Forvaltningsstyresmakta kan gje dispensasjon for vitskaplege undersøkingar og tiltak av vesentleg samfunnsmessig verdi.