Bjoreidalen

Bjoreidalen naturreservat ligg på Hardangervidda i Eidfjord kommune, mellom riksveg 7 og Hardangervidda nasjonalpark. Reservatet er på om lag 4795 dekar og er freda som eit fjell- og våtmarksområde med myrområde og frodige vierkratt langs elvar og bekkar. Berggrunnen er granitt med eit lausmassedekke av morene og breelvavsettingar.

Området har store naturfaglege verdiar knytt til fugleliv. Det er registrert 55 fugleartar, og 33 av desse hekkar i reservatet. Blant hekkande artar finn ein krikkand, boltit, myrsnipe, dobbeltbekkasin, fjøreplytt og lappsporv. Sporadisk hekkar også artar som fjellvåk, brushane og fjelljo.

Reservatet vart freda ved kongeleg resolusjon 15. desember 1995. Forskrifta forbyr all skade på vegetasjon og dyreliv, og jakt er ikkje tillate. I perioden 20. mai til 20. juli er all ferdsel utanom særskilt oppmerka stiar forbode, for å verne om hekkande fugl. Camping og teltslaging er også forbode i denne perioden, med unntak av nær stølshus. Motorisert ferdsel er generelt forbode, men er tillate på snødekt mark om vinteren. Fiske, sanking av bær og sopp, samt beite er tillate aktivitetar. Forvaltningsansvaret ligg hos Statsforvalteren i Vestland.