Solevågsfjellet

Solevågsfjellet naturreservat ligg i Sula kommune i Møre og Romsdal, sør mot Storfjorden. Reservatet er på 3501 dekar og vart freda ved kongeleg resolusjon 17. desember 1999. Det er forvalta av Statsforvalteren i Møre og Romsdal.

Området representerer noko av den mest særeigne kystfuruskogen i Skandinavia og er eit av dei nordlegaste og viktigaste førekomstane av denne skogtypen. Kystfuruskogen er tilpassa det havnære klimaet, og den eldste furua i området nærmar seg 200 år. I tillegg til furu finst hassel, bjørk, gråor, svartor, osp, alm og barlind. Vegetasjonen er variert med lågurtskog, røsslyngblokkebærfuruskog og blåbærfuruskog. Området har eit rikt planteliv med mellom anna orkidear som breiflangre og skogmarihand, og den sterkt luktande ramslauken. Framande artar som gran og platanlønn er registrert, og barlinda vert skada av hjortegnag.

Formålet med fredinga er å sikre skogområdet med alt naturleg plante- og dyreliv. Forskrifta forbyr mellom anna hogst, innføring av nye plante- og dyreartar, motorisert ferdsel, inngrep som kan endre naturmiljøet, samt idrettsarrangement og organisert bruk. Sanking av bær og matsopp, jakt, fiske og beiting på eit forsvarleg nivå er likevel tillate. Forvaltningsstyresmakta kan etter søknad gje løyve til mellom anna fjerning av framande treslag og merking av eksisterande stiar.