Storevika

Storevika naturreservat ligg i Sande kommune i Møre og Romsdal og vart freda ved kgl.res. 27. mai 1988. Reservatet dekkjer eit areal på om lag 339 dekar, der 137 dekar er sjøareal. Området er eit marint gruntvassområde hovudsakleg på finsandsubstrat, og er ein viktig raste- og overvintringsplass for fugl.

Naturfagleg er området særleg verdifullt for vadefuglar og sjøfugl. Det er registrert 15 fuglartar av regional interesse og 4 av nasjonal interesse. Mellom trua artar som er observerte her finn ein svarthalespove, stjertand, knekkand, bergand og brushane. Området har også blant dei største konsentrasjonane av overvintrande gråstrupedykkar i Noreg. Botanisk er store fjøresaltgrasenger av interesse, og det er registrert artar som bogestorr og saftmelde.

Føremålet med fredinga er å ta vare på eit viktig våtmarksområde med tilhøyrande plantesamfunn, fugleliv og anna dyreliv. Forskrifta forbyr mellom anna all skade på vegetasjon, jakt og fangst, motorisert ferdsel til lands og inngrep som kan endre dei naturgjevne tilhøva. Lågtflyging under 300 meter er òg forbode. Slått, beiting, fiske og motorferdsel i næringsføremål er likevel tillate. Forvaltinga er lagt til Statsforvaltaren i Møre og Romsdal.