Røabukta

Røabukta fuglefredingsområde ligg på vestsida av Gossen i Aukra kommune, Møre og Romsdal. Området omfattar om lag 1916 dekar, der sjøarealet utgjer om lag 1808 dekar. Det består av langgrunne strender med sand, leire og svaberg, samt lyng- og graskledde holmar.

Området har stor variasjon i plantearter og naturtypar. Det er registrert 71 plantearter, mellom anna sjeldne arter som strandreddik, sandstarr, saft-stjerneblom og sverdlilje. Sanddynene er særleg viktige habitat. Røabukta er ein sentral lokalitet for grågås og ei rekkje andre fuglearter, og har spesiell verdi som vinterbeite for lommar, dykkerar og dykkender. Dei raudlista artane horndykkar og lomvi er registrert i området. Av pattedyr finst hjort, rådyr, oter og steinkobbe.

Området vart freda ved kongeleg resolusjon 27. mai 1988 med heimel i naturvernlova. Føremålet er å ta vare på eit viktig våtmarksområde med sitt livsmiljø, fugleliv og anna dyreliv.

Fredingsreglane forbyr mellom anna skade på vegetasjon av verdi for fuglelivet, jakt og fangst, motorisert ferdsel til lands og lågtflyging under 300 meter. Tiltak som kan forringe fuglane sitt livsmiljø, som drenering, masseutttak eller forureining, er òg forbode. Fiske, slått, beiting og motorferdsel i næringsføremål er likevel tillate. Forvaltinga er lagt til Statsforvaltaren i Møre og Romsdal.