Roaldsand

Roaldsand dyrefredningsområde ligg i Giske kommune i Møre og Romsdal, ved Vigra. Området vart freda ved kongeleg resolusjon 27. mai 1988 og dekkjer eit totalareal på om lag 863 dekar, der nær 94 prosent er sjøareal. Området er eit viktig trekk- og overvintringsområde for fugl, med 12 fugleartar av regional interesse og 6 av nasjonal interesse. Dei langgrunne sandstrendene og leirane utgjer dessutan det største flygesandsområdet i fylket, og det er registrert 95 planteartar i området, mellom dei fleire sjeldne. Området er òg ein del av Ramsarkonvensjonen sidan 1996, som sikrar internasjonalt viktige våtmarkssystem.

Føremålet med fredinga er å ta vare på eit viktig våtmarksområde med sitt fugleliv og andre naturverdiar. Verneforskrifta forbyr mellom anna jakt, fangst, bruk av skytevåpen og å sleppe laus hund. Vegetasjon som er av verdi som livsmiljø for fuglar er freda mot skade og øydelegging. Tiltak som kan endre dei naturgjevne produksjonstilhøva eller forringe fuglane sitt livsmiljø, som drenering, uttak av masse og forureining, er heller ikkje tillate. Motorisert ferdsel er i hovudsak forbode, men unntak gjeld mellom anna for næringsføremål og naudsynt offentleg verksemd. Statsforvaltaren i Møre og Romsdal er forvaltningsmyndigheit.