Eikefjordholmane

Eikefjordholmane naturreservat ligg i Kinn kommune i Vestland og vart verna ved kgl.res. 28. mai 1993. Reservatet består av tre holmar: Kvalvikholmen, Notaholmen og Middagsholmen, med eit samla areal på om lag 110 dekar, der 24 dekar er landareal.

Verneformålet er å gje sjøfuglane gode og trygge livsvilkår og å ta vare på ein viktig hekkelokalitet for sjøfugl med naturleg tilhøyrande vegetasjon og dyreliv. Reservatet er blant dei viktigaste i fylket for fiskemåse, med rundt 50 hekkande par. Det er også eit av få område i fylket der makrellterne hekkar. Vegetasjonen er prega av strandeng med innslag av lauvtre og planta furu.

Etter verneforskrifta er all vegetasjon og alt dyreliv verna mot skade og øydelegging. Det er forbod mot inngrep som kan endre dei naturlege tilhøva, og lågtflyging under 300 meter er ikkje tillate. I tida 1. april til 31. juli er det forbod mot ilandstiging og ferdsel på land og i ei sone på om lag 50 meter frå land. Tradisjonelt sauebeite og naudsynt ferdsel knytt til dette er likevel tillate, og det same gjeld yrkesfiske og ferdsel i oppmerka skipslei.