Lusaheia

Lusaheia landskapsvernområde ligg i Hjelmeland og Sandnes kommunar i Rogaland og er 122 km². Området representerer eit typisk utsnitt av Ryfylke-høghei med eit fjellplatå av blankskurte granitter og gneisar, eit påfallande stort antal flyttblokker og eit utal av små vatn. Storådalen skil seg ut med samanhengande vegetasjon og kulturminne knytt til beitebruk og ferdsle. Ein viktig verneverdi er at området er leveområde for villreinstamma i Setesdal Vesthei og Ryfylkeheiane. Denne naturtypen er elles sterkt utsett for kraftutbyggingsinngrep i Rogaland.

Området vart verna ved kgl.res. 19. april 1991 med heimel i naturvernlova. Føremålet er å ta vare på eit særmerkt og vakkert høgfjellslandskap med sjeldsynte og sårbare naturelement. Verneforskrifta forbyr inngrep som vesentleg kan endra landskapet sin karakter, mellom anna vegbygging, nydyrking, granplanting og framføring av luftleidningar. Motorferdsle i utmark og vassdrag er forbode, men forvaltningsstyresmakta kan gje dispensasjon. Organisert ferdsel og turisme kan regulerast av omsyn til villreinen, og nye turistløyper må godkjennast. Vanleg landbruksdrift og naudsynt vedlikehald av eksisterande anlegg er tillate.