Svanvikmyra

Svanvikmyra naturreservat ligg sør for Eide sentrum i Hustadvika kommune, Møre og Romsdal, og dekkjer eit areal på om lag 962 dekar. Reservatet vart freda ved kongeleg resolusjon 13. desember 1996, og formålet er å ta vare på eit stort og variert myrkompleks med verneverdi som nasjonalt typeområde.

Området er eit myrkompleks som vekslar mellom ombrotrof planmyr, flatmyr og tuebakkemyr. Vegetasjonen er variert og inneheld mellom anna røsslyng, torvull, dvergbjørk, molte, krekling og kvitlyng. Suboseaniske artar som pors, kystmyrklegg, heiblåfjør og kysttjønnaks er også til stades. I sig nordvest i området finst rik og ekstremrik vegetasjon med artar som svarttopp, blåsprett, breiull, bjønnbrodd og den krevjande sivarten brunskjene.

Ifølgje verneforskrifta er all vegetasjon freda mot skade og øydeleggjing, og det er forbode å innføre nye planteartar eller fjerne planter frå reservatet. Tiltak som kan endre dei naturgjevne tilhøva, som drenering, oppfylling, gjødsling og bruk av kjemiske plantevernmiddel, er ikkje tillate. Motorisert ferdsel er forbode. Tradisjonell beiting, sanking av bær og matsopp og framkjøring av tømmer på snødekt frosen mark er likevel tillate. Forvaltinga er lagt til Statsforvalteren i Møre og Romsdal.