Nærøyane

Nærøyane naturreservat ligg om lag 5 km nord for Florø, i den indre skjergarden mellom Hellefjorden og Årebrotsfjorden i Kinn kommune. Området er eit marint våtmarksområde med øyar, holmar og skjer. Øyane er låglendte med store og flate myrområde, og berggrunnen er dominert av devonsk sandstein og konglomerat.

Området har stor verdi som trekk- og overvintringslokalitet for våtmarksfugl, og som typeområde for atlantisk lynghei. Det er registrert 56 artar av våtmarksfugl, og myrsnipe, tjuvjo og teist er påvist hekkande. Nordre-Nærøy med omliggande holmar og skjer har status som naturreservat, medan Apalholmen, Brændholmen og Søre-Nærøy har status som fuglefredingsområde. Det er også registrert fleire førhistoriske gravrøyser på Nordre-Nærøya.

Fredinga vart fastsett ved kgl.res. 20. desember 1991. Verneforskrifta forbyr mellom anna all skade på vegetasjon og dyreliv, jakt og fangst, motorisert ferdsel på land og lågtflyging under 300 meter. I tida frå 1. april til 1. august er all ilandstigning og ferdsel på land og sjø ut til 50 meter frå land forbode i naturreservatet. Tradisjonell slått og beiting, fiske og jakt på hjortedyr er likevel tillate. Forvaltningsstyresmakt er Statsforvalteren i Vestland.