Nærøyane

Nærøyane fuglefredingsområde ligg om lag 5 km nord for Florø i Kinn kommune, i den indre skjergarden mellom Hellefjorden og Årebrotsfjorden. Øyane og holmane er låglendte med store og flate myrområde, og berggrunnen er dominert av devonsk sandstein og konglomerat.

Området er eit marint våtmarksområde med fleire øyar, holmar og skjer, og har sentral funksjon som trekk- og overvintringsplass for fleire artar av vassfugl. Det er registrert 56 artar av våtmarksfugl, mellom anna myrsnipe, tjuvjo og teist som hekkar her. Området er òg eit typeområde for atlantisk lynghei. Nordre Nærøy med omliggande holmar og skjer har status som naturreservat, medan Apalholmen, Brændholmen og Søre-Nærøy har status som fuglefredingsområde.

Området vart freda ved kongeleg resolusjon 20. desember 1991. Verneforskrifta forbyr all skade på vegetasjon og dyreliv, jakt, fangst og motorisert ferdsel på land. Lågtflyging under 300 meter er òg forbode. I tida frå 1. april til 1. august er all ilandstigning og ferdsel på land og sjø ut til 50 meter frå land forbode i naturreservatet. Tradisjonell slått og beiting, fiske og sanking av bær og matsopp er likevel tillate. Forvaltningsstyresmakta er Statsforvaltaren i Vestland.