Dyrøysundskjeret

Dyrøysundskjeret naturreservat ligg i Masfjorden kommune i Vestland fylke. Det er eit lite, lågt skjer i skjerma farvatn i Dyrøysundet, mellom Dyrøy og Haugsøy nordaust i Fensfjorden. Reservatet vart oppretta ved kgl.res. 3. april 1987 og dekkjer eit totalareal på 13 dekar, der berre 0,75 dekar er landareal. Resten er sjøareal.

Verneformålet er å sikre gode vilkår for sjøfugl og ta vare på ein viktig hekkelokalitet. Utgangspunktet for vernet var ein hekkekoloni med 35 par makrellterne i 1980. Så seint som i 1998 hekka det 25 par makrellterne her, men etter dette er det ikkje registrert hekking. Skjeret har framleis preg av fuglegjødsling, og naturtilstanden vert rekna som god. Mink i området vert vurdert som eit mogleg trugsmål.

Ifølgje verneforskrifta er all vegetasjon freda, og alt vilt inkludert sjøpattedyr, reir og egg er verna mot skade og uroing. I perioden 15. april til 31. juli er det forbod mot ilandstiging og ferdsel på skjeret og i ei sone på 50 meter frå land. Lågflyging under 300 meter er heller ikkje tillate i denne perioden. Jakt, fangst og bruk av skytevåpen er forbode frå 1. april til 9. september. Det er òg forbode å setje i verk tiltak som kan endre dei naturgitte tilhøva i området.