Ølveshovda

Ølveshovda landskapsvernområde med plantelivsfredning ligg i ei sørvendt li på neset om lag 1 km sørvest for Ølve i Kvinnherad kommune. Området dekkjer eit areal på om lag 397 dekar og er verna ved kgl.res. av 13. oktober 2000. Forvaltningsmyndigheit er Statsforvalteren i Vestland.

Området har særleg store naturfaglege kvalitetar knytt til førekomst av barlind og kristtorn, som begge er talrike, velutvikla og naturleg avgrensa. Dette gjer området til ein av dei beste lokalitetane for desse artane i ytre Hardanger. Furuskogen er frodig og prega av nemorale og oseaniske artar, med innslag av ask, svartor, hegg og bjørk. Feltsjiktet er artsrikt med mellom anna ramslauk, myske, raudflangre og sanikel. Dei tørre strandberga har ein interessant vegetasjon med artar som kystbergknapp og blodstorkenebb.

Verneformålet er å sikre eit variert naturmiljø med vitale bestandar av barlind og kristtorn. Etter verneforskrifta er barlind og kristtorn freda mot skade og øydelegging, og nye planteartar må ikkje førast inn. Inngrep som vesentleg kan endre landskapets art eller karakter er forbode, og motorisert ferdsel er ikkje tillate. Skogsdrift kan berre skje etter godkjend plan, og skal gjennomførast som plukk- og tynningshogst som fremjar naturleg tresamansetting og utvikling av barlind og kristtorn. Tradisjonelt beite er tillate, men Miljødirektoratet kan regulere beitetrykket om nødvendig.