Fjørtoftneset

Fjørtoftneset naturreservat ligg vest på Fjørtofta i Haram kommune, Møre og Romsdal, og vart freda ved kgl.res. 13. desember 1996. Reservatet dekkjer eit areal på om lag 2256 dekar, der rundt 1520 dekar er sjøareal.

Området har store naturfaglege verdiar knytt til myr, strandsone og sjøfugl. Myrkomplekset inneheld fleire ulike myrtypar, mellom anna planmyr, øyblandingsmyr og flatmyr, med både nedbørsmyr og jordvassmyr. Karakteristiske planter er gråmose, torvull, måbjønnskjegg, kystmyrklegg og heiblåfjør. Langs strendene finst godt utvikla strandvegetasjon, og på nordsida er det breie tangvollar med frodig tangvollvegetasjon. Tangvollane har høg biologisk produksjon og er viktige for trekkande fuglar. Reservatet er også ein sentral hekke-, overvintrings- og trekklokalitet for sjøfugl.

Fredningsforskrifta slår fast at all vegetasjon er freda mot skade og øydeleggjing, og at nye planteartar ikkje må innførast. Alt vilt er freda, og jakt, fangst og bruk av skytevåpen er forbode. Det er heller ikkje tillate å setje i gang tiltak som kan endre dei naturgjevne tilhøva, som bygging, drenering, masseuttak eller bruk av kjemiske plantevernmiddel. Camping og motorisert ferdsel på land er forbode, det same gjeld lågtflyging under 300 meter. Tradisjonell beiting, sanking av bær og matsopp, fiske og fangst av sjøskaldyr er likevel tillate. Forvaltinga ligg hos Statsforvaltaren i Møre og Romsdal.