Raudøya

Raudøya naturreservat ligg i Ørstafjorden i Ørsta kommune, Møre og Romsdal, og vart freda ved kgl.res. 13. oktober 2000. Reservatet dekkjer eit landareal på 78 dekar.

Området er særleg kjent for ein svært livskraftig førekomst av kristtorn, som er den største i fylket. Dei største trea er over 10 meter høge, og det er registrert fleire hundre individ. Kristtornen veks dels i reine småbestand og dels som einskildtre i anna skog. Furu og bjørk er dei dominerande treslaga elles, og ein kan også finne barlind i området. Raudøya naturreservat er dessutan vald ut som bevaringsområde for genetiske ressursar i kristtorn, som ledd i eit europeisk program for bevaring av genetiske ressursar i skogtre. Ein utfordring for området er gjengroing, som mellom anna fører til at einer er i ferd med å dø ut.

Føremålet med fredinga er å sikre eit naturmiljø med ein stor og vital førekomst av kristtorn i Møre og Romsdal. Forskrifta forbyr mellom anna skade på vegetasjon og dyreliv, innføring av nye planteartar, motorisert ferdsel og tiltak som kan endre naturmiljøet. Sanking av bær og matsopp, jakt, fiske og tradisjonell beiting er likevel tillate. Forvaltningsstyresmakta kan etter søknad gje løyve til organisert verksemd og vedhogst til eige bruk.