Storeidet

Storeidet naturreservat ligg i Sykkylven kommune i Møre og Romsdal, om lag 5 km vest for Ikornes. Reservatet er på ca. 520 dekar og vart freda ved kongeleg resolusjon 13. desember 1996. Formålet er å ta vare på eit variert myrområde med verdi som nasjonalt typeområde.

Området er eit samanhengande myrkompleks med helling mot vest. Det er innslag av høgmyr i aust, men planmyr dominerer. Begge myrtypane har fine erosjonssystem. Torvlaget er 1–2 meter djupt, og somme stader heilt opp i 3 meter. På myrane dominerer ombrotrof tuevegetasjon med dvergbjørk, småvaksen furu og gråmose. Langs bekken står det oreskogar med rik vegetasjon. Interessante planteartar i området er jåblom, bjønnbrodd, strengstarr og breiull.

Fredningsforskrifta forbyr all skade på vegetasjon, innføring av nye planteartar og tiltak som kan endre dei naturgjevne tilhøva, som til dømes drenering, oppfylling, gjødsling og bruk av kjemiske plantevernmiddel. Motorisert ferdsel er òg forbode. Tradisjonell beiting og sanking av bær og matsopp er likevel tillate. Det er gjort unntak for vedlikehald av kraftlinja som går gjennom området, og for framkjøring av tømmer på snødekt, frosen mark.