Fræneidet

Fræneidet naturreservat ligg i Hustadvika kommune i Møre og Romsdal, i ein open dal mellom Eide og Elnesvågen. Reservatet er på om lag 1406 dekar og vart freda ved kgl.res. 13. desember 1996.

Området er eit uvanleg variert myrlandskap dominert av bakkemyr i hellande terreng, oppdelt av furu- og bjørkeskog. Her finst både flatmyr og strengmyr, og området har eit særleg rikt planteliv. Fattig fastmattevegetasjon er dominert av blåtopp, torvull, pors og røsslyng, medan store areal har rik og ekstremrik vegetasjon med artar som brunskjene, engmarihand, bjønnbrodd og myrsaulauk. Formålet med fredinga er å ta vare på området som eit nasjonalt typeområde for variert myrvegetasjon.

Ifølge verneforskrifta er all vegetasjon freda mot skade og øydeleggjing, og det er forbode å innføre nye planteartar. Tiltak som kan endre dei naturgjevne tilhøva er ikkje tillate, og motorisert ferdsel er forbode. Tradisjonell beiting, sanking av bær og matsopp og framkjøring av tømmer på snødekt frosen mark er likevel tillate. Forvaltingsmyndigheita kan gje løyve til nødvendig vedlikehald av eksisterande skogsveg og uttak eller planting av skog på fastmark. Forvaltingsansvaret ligg hos Statsforvalteren i Møre og Romsdal.