Lomstjønna

Lomstjønna naturreservat ligg på Harøy i Ålesund kommune, Møre og Romsdal, og dekkjer eit areal på om lag 105 dekar. Området er eit temmelig flatt og einsarta fattigmyrlandskap med ei tjønn og fleire smådammar, og utgjer ein representativ del av hei- og myrlandskapet på øya. Reservatet er ein viktig hekkelokalitet for artar knytt til opne, myrlendte kystheier, som grågås, heilo, spover, måsefuglar og enkelte andeartar, i tillegg til spesielle artar som svømmesnipe og lappspurv. Den 19. mars 1996 blei området omfatta av Ramsarkonvensjonen, som skal sikre internasjonalt viktige våtmarkssystem. Ei utfordring for området er leplantingar og igjengroing, men det er gjennomført tiltak for å fjerne desse.

Reservatet blei freda ved kgl.res. 27. mai 1988 med føremål om å ta vare på eit viktig våtmarksområde med tilhøyrande plantesamfunn, fugleliv og anna dyreliv. Fredingsføresegnene forbyr mellom anna all skade på vegetasjon, jakt og fangst, motorisert ferdsel til lands, og inngrep som kan endre dei naturgjevne tilhøva. Slått, beiting og etablert jordbruksdrift, fiske og jakt på villmink er likevel tillate. Forvaltinga er lagt til Statsforvalteren i Møre og Romsdal.