Åmsmyra

Åmsmyra naturreservat ligg på Åm, omlag 5 km søraust for Ørsta sentrum i Møre og Romsdal. Reservatet er på 285 dekar og vart freda ved kgl.res. 13. desember 1996.

Området er eit variert og velavgrensa myrområde med ei stor platåhøgmyr sentralt. Høgmyra er dominert av ombrotrof tuevegetasjon med røsslyng, reinlav og gråmose, samt høljer med fast- og mjukmatter. Flatmyra er fattig og dominert av blåtopp, pors og slåttestarr. Interessante artar i området er mellom anna engstarr, heiblåfjør, kystmyrklegg, kysttjønnaks og solblom. Formålet med fredinga er å ta vare på høgmyra som eit nasjonalt typeområde, der innslaget av andre myr- og naturtypar aukar verneverdien ytterlegare.

Fredingsforskrifta forbyr all skade på vegetasjon, innføring av nye planteartar, inngrep som endrar naturgjevne tilhøve, og motorisert ferdsel. Tradisjonell beiting, sanking av bær og matsopp, og framkøyring av tømmer på snødekt frosen mark er likevel tillate. Forvaltinga er lagt til Statsforvaltaren i Møre og Romsdal.