Nesvika

Nesvika naturreservat ligg ved Haukelandsvatnet i Bergen kommune og vart freda ved kgl.res. 15. desember 1995. Reservatet dekkjer eit areal på om lag 120 dekar, der 48 dekar er landareal.

Området er ei vik som vart nesten avsnørt etter at Haukelandsvatnet vart senka med 1,25 meter. Verneformålet er å ta vare på ein lokalitet med velutvikla vassvegetasjon som har trekk- og hekkefunksjon for dykk- og grasender. Reservatet er særleg viktig som hekke- og næringssøksområde for våtmarksfuglar. Blant artar som er observert her er stokkand, krikkand, kvinand, toppand, songsvane og ei rekkje vadefuglar og songfuglar. Vegetasjonen er dominert av kjempesøtgras, flaskestarr, strandrøyr og ulike vierartar.

Området er påverka av næringstilsig frå omkringliggjande jordbruksareal og avrenning frå eit tidlegare bossdeponi. Attgroing med tre og buskar er eit aukande problem, og det er sett i gang tynning av skog for å oppretthalde området sin funksjon for andefuglar.

Fredningsforskrifta forbyr all skade på vegetasjon og dyreliv, jakt og fangst, motorisert ferdsel, camping og inngrep som kan endre dei naturlege tilhøva. Fiske, sanking av bær og matsopp og beite som ved vernetidspunktet er likevel tillate. Forvaltningsstyresmakta kan gje løyve til mellom anna kontrollert tynning av kratt og skog i perioden 1. november til 1. mars, samt rydding av vegetasjon i samsvar med godkjent forvaltningsplan.