Viksefjord

Viksefjord naturreservat ligg inst i Viksefjorden i Sveio kommune, om lag 6 km sørvest for Sveio sentrum. Reservatet dekkjer eit areal på om lag 75 dekar, der 30 dekar er landareal og 45 dekar er sjøareal.

Området er eit produktivt gruntvassområde langs kysten med særleg verdi for trekkande ender, gjess og vadefuglar. Dei vanlegaste vadefuglane under trekket er vipe, tjeld og raudstilk, og på haustrekk er også heilo, dvergsnipe, polarsnipe, myrsnipe og sandlo registrert. Grunne sjøområde med leirbotn som kjem til syne ved fjøre sjø er ein relativt sjeldan naturtype i Hordaland. Havstrandvegetasjonen er godt utvikla, særleg dei hydrolittorale pionersamfunna med saltbendel, der førekomsten er den største registrerte i Hordaland. I Viksefjorden finst det også velutvikla undervassenger med ålegras.

Området vart freda ved kgl.res. 15. desember 1995. Fredningsforskrifta forbyr mellom anna all skade på vegetasjon, jakt og fangst, motorisert ferdsel på land og vatn, lågtflyging under 300 meter, camping og tiltak som kan endre dei naturlege tilhøva. Beite, fiske og sanking av bær og matsopp er likevel tillate. Forvaltningsstyresmakt er Statsforvalteren i Vestland.