Fossevatna

Fossevatna naturreservat ligg om lag seks km nordvest for Knarvik i Alver kommune, i eit lite dalføre mellom Kvamsvågen og Seim. Reservatet er på 444 dekar og omfattar eit myrområde rundt dei to vatna Litlavatnet og Storavatnet, som begge ligg om lag 90 moh.

Dei naturfaglege kvalitetane er knytt til området sin funksjon som raste- og hekkeområde for våtmarksfuglar, og til intakt kystmyr. Det meste av arealet er fattig kystmyr med både nedbørsmyr og jordvassmyr. Låge ryggar med furuskog dekkjer om lag ein tredjedel av arealet. Vegetasjonen er typisk artsfattig med røsslyng, klokkelyng, blåtopp, pors og rome. Det er registrert nærmare 120 fugleartar i området, der dei vanlegaste hekkande våtmarksartane er stokkand, krikkand, strandsnipe, enkeltbekkasin, raudstilk og sivsporv.

Reservatet vart freda ved kongeleg resolusjon 15. desember 1995 med heimel i den dåverande naturvernlova. Føremålet er å verne eit relativt urørt trekk- og hekkeområde med ein mosaikk av fleire naturtypar.

Fredningsreglane forbyr mellom anna all skade på vegetasjon og dyreliv, jakt, motorisert ferdsel, camping og inngrep som kan endre dei naturlege tilhøva. Det er likevel høve til beite, fiske, sanking av bær og matsopp, jakt på hjort med kontrollert bruk av hund, samt vedlikehald av eksisterande stiar og kraftlinjer. Forvaltningsstyresmakta kan i særskilde høve gje løyve til tiltak som hogst av ved, kontrollert uttynning av skog og rydding av vegetasjon.